Dimanch 18 me 2025 la, biwo ansyen Prezidan ameriken Joe Biden fè konnen li dyagnostike avèk yon fòm kansè pwostat ki agresiv. Nouvèl sa a soulve anpil reyaksyon nan peyi Etazini ak rès mond lan.
Joe Biden, ki te sèvi kòm ansyen Prezidan Etazini, ap fè fas ak yon fòm kansè pwostat ki deja anvayi zo li. Nouvèl sa a revele yon sitiyasyon medikal ki mande anpil atansyon. Kansè « fòm agresiv » sa a make yon nouvo etap nan lavi Biden, ki te toujou montre anpil detèminasyon nan lavi politik li.
Pandan fanmi Biden an ap chèche pi bon opsyon tretman posib, li enpòtan pou konprann kansè pwostat « nivo 5 » sa a se yon fòm ki mande yon repons rapid ak efikas. Medsen li yo ap travay san pran souf pou devlope yon plan tretman ki apwopriye pou li.
Reyaksyon yo pa pran anpil tan pou tonbe. Pandan moman difisil sa a, Donald Trump, aktyèl prezidan Etazini an, ak madanm li Melania Trump, eksprime solidarite yo ak sipò bay Biden ak fanmi li. Sa montre yon fwa ankò kijan politik pa dwe anpeche limanite, sitou lè yon moun fè fas ak pwoblèm sante grav.
Joe Biden, 82 lane, te sèvi kòm premye prezidan Etazini ki gen plis laj lè li kite Lamezon Blanch, toujou rete yon figi enpòtan nan politik ameriken an. Li te toujou montre yon detèminasyon fèm ak yon devouman pou sèvis piblik la, imigran ki soti nan divès peyi pòv nan mond lan, espesyalman sila ki anba « Pwogram Biden » lan.
Kominote entènasyonal la ap swiv avèk enterè evolisyon sante Biden pandan li ap fè fas ak maladi sa a. Sipò ak priyè yo ap ogmante pou li ak fanmi li, pandan tout moun espere pou tretman yo chwazi a pote rezilta pozitif. Yon bagay ki sèten, se nan moman sa a, Biden ap bezwen tout lanmou ak ankourajman posib nan batay li kont kansè a.
