Kodak Black se youn nan rapè ameriken ki toujou nan demele ak lajistis akoz yo souvan jwenn li ak marigwana oswa dwòg.
Mèkredi 21 fevriye sa a, rapè ameriken an ki gen rasin li nan peyi Dayiti kayonnen yon fotojounalis WPLG Local 10 anba kout wòch.
Kodak Black fè yon pote boure, tankou chyen anraje, sou repòtè a. Li menm menase bay li yon kout pwen. Sa rive pandan rapè a, ki gen bon non l Dieuson Octave, fenk libere nan prizon.
Rapè 26 lane a sot pase anviwon 2 mwa deyè 4 miray. Se jij distri Jose E. Martinez ki te bay lòd pou libere l, devan yon tribinal federal Miami.
Kodak Black se yon nonm ki pran prizon tankou se chanm kay li. Soti lane 2015, 2016, 2018, 2019 pou bout nan lane 2022 lapolis toujou mete l anba kòd akoz yo jwenn li ak marigwana oswa dwòg.
